الصفحة الرئيسية › أخبار وطنية

أخبار وطنية في رسالة عنوانها "اشبينا ولاد الكرم زهرنا... ؟": شاب يكشف الاوضاع الاجتماعية الصعبة ويتساءل

تحت عنوان "اشبينا ولاد الكرم زهرنا... ؟؟" نشرت صفحة "أولاد الكرم" رسالة لاحد شبان الجهة عبر فيها عن تردي الأوضاع الاقتصادية والاجتماعية للمتساكنين وهذا ما جاء فيها:

"اشبينا ولاد الكرم زهرنا...؟؟

علاش مكتوب علينا الحُقرة و التهميش ؟؟ علاش عشش عندنا الاجرام ؟؟ علاش زهرنا جينا في اعز بلاصة جغرافيا و اخيب بلاصة اقتصاديا ؟؟ نحكي البارح مع ولد حومة و الله العظيم سخفني و قريب يبكيني قالي يا فلان راني كرهت الفساد ، كرهت النطرة و البراكاجات كرهت الزطلة و الحرابش قالي والله موش مني ، اش اتحبني نعمل و انا العايلة زواولة و انا بطال و مفما حتى حاجة فيها امل نتعلق بيه.

يا جماعة كل ولاد الكرم نفس اللغة و نفس التفكير حتى واحد ما فارح بروحو و مرتاح بكلها عيشتها ضياقت و كرهت لحبوسات اما اش اتحبنا نعملوا و الدولة حاقرتنا زوز كيلومتر عالقصر ، قدامنا البحر و ورانا حدائق قرطاج الميترو بثلاثة ملاين و نصف ، على يمينا البحيرة و على يسارنا قرطاج ، و احنا حفرة فيها اقوى انواع الفقر و الهم و الغم الى متى الدولة مغمضة عينيها علينا ؟؟

فلوس البلاد عند الأثرياء واحنا حتى مشروع تنموي بلدية الكرم و من 7 سنين اول مرة تعمل مناظرة و ما حاجتها كان ب 25 واحد ؟؟ 75 الف ساكن في الكرم و اكثر من 16500 عائلة ، كان كل عايلة فيها بطال واحد رانا 16.000 بطال و انت اتقلي 25 واحد ؟؟

الوالي يجي مرتين للحومة في جنح الظلام و عمره ما سمع معاناة ولاد الكرم الحقيقية جاناش مسؤول مهم منذ الانتخابات ؟؟ عملوش اجتماع بالاهالي لمعرفة مشاكل الجهة ؟؟ ابداا .. اهوكا سيبونا الحرقة ، الزطلة و الحرابش ، نستانسوا بالزطلة و الحرابش و نهار اللي ماعندناش فلوس باش نشروهم ندوروا على بعضنا ننطروا و ندغروا ، هاذي عيشت ولد الكرم و هاذي حالنا التعيسة".